ምሥጢረ ሥላሴ (ክፍል ፪ )

Mistre Selasie Part-2, READ IN PDF here

ለመጽሐፍ ቅዱስ ጥናታችን ማወቅ ከሚገባን ጉዳዮች መካከል በእግዚአብሔርና በክርስቶስ ማመን (ምሥጢረ-ሥላሴና ምሥጢረ-ሥጋዌ) አንዱ መሆኑን በመጥቀስ ምሥጢረ ሥላሴን ባለፈው በመጀመር የእግዚአብሔርን አንድነትና ሦስትነት ማየታችን ይታወሳል። እግዚአብሔር (ሥላሴ) በስም፡ በአካል፡ በግብር ሦስት መሆኑን በቀሩት ነገሮች በመፍጠር፡ በማዳን፡ በመለኮት፡ በሕልውና… አንድ መሆኑን ተመልክተናል።

የእግዚአብሔር ባሕርይ እጅግ ምጡቅና የማይመረመር ስለሆነ እኛም ካለብን የቋንቋና የአእምሮ ውስንነት የተነሳ ሙሉ በሙሉ መረዳት እንደማንችል የታወቀ ነው። ይሁን እንጂ በመጠኑ ስለርሱ ለማወቅ በምሳሌ አባቶች ያስተምራሉ። እግዚአብሔርን የሚመስለው ነገር ባይኖርም የእኛን የመረዳት ችግር ለማገዝ ለማስተማሪያ ይናገራሉ። በዚህ ክፍል ለምሥጢረ-ሥላሴ የሚቀርቡ ምሳሌዎችንና መጽሐፍ ቅዱሳዊ ጥቅሶችን በመጠኑ እናያለን።

ለምሥጢረ-ሥላሴ የሚቀርቡ ምሳሌዎች፡

፩. ፀሐይ፡ ፀሐይ ሦስት ነገሮች አሉአት፡ ክበብ፡ ብርሃን፡ ሙቀት፡፡ ነገር ግን አንድ ፀሐይ ትባላለች። በክበቧ -አብ፡ በብርሃኗ-ወልድ፡ በሙቀቷ-መንፈስ ቅዱስ ይመሰላሉ። (ሰው የሆነው ወልድ ኢየሱስ ክርስቶስ «እኔ የዓለም ብርሃን ነኝ» ማለቱን ልብ ይሏል፡ ዮሐ ፰፡፲፪።)። አንድ ፀሐይ በመባሏ አንድ አምላክ ይባላል። ፀሐይ ሦስት ነገሮች ስለአሉአት ሦስት ፀሐይ ሳይሆን አንድ ፀሐይ እንደምትባል ሁሉ እግዚአብሔርም አብ ወልድ መንፈስ ቅዱስ የሚሉ ሦስት ስሞች፡ ፫ አካሎች፡ ፫ ግብሮች ቢኖሩትም አንድ አምላክ ይባላል እንጂ ሦስት አማልክት አይባልም።

የፀሐይ ክበብ በላይ በሰማይ ሆኖ ብርሃንና ሙቀት ወደ ምድር ይደርሳሉ። አብ በሰማይ ሆኖ ወልድ ና መንፈስ ቅዱስ ወደ ምድር መጥተዋል። ወልድ ከእመቤታችን ከቅድስት ድንግል ማርያም ሰው ሆኖ በመወለድ፡ መንፈስ ቅዱስ ደግሞ በርግብ አምሳል በሐዋርያት በመውረድ። ስለዚህ ፀሐይ በመጠኑም ቢሆን የሥላሴን አንድነትና ሦስትነት እንድንረዳ ትረዳናለች።

፪. የሰው ነፍስ፡- ነፍስ ሶስት ነገሮች አሉአት፡፡ ልብ፡ ቃል እስትንፋስ። እነዚህም የሦስቱ የነፍስ ባሕርያት ምንጭ የሆኑት ለባዊነት (ማሰብ)፡ ነባቢነት (መናገር)፡ ሕያውነት (ዘላለማዊነት) ናቸው።  እነዚህ ግን በአንድ ሰው ነፍስ ነው ያሉት። በልብ-አብ፡ በቃል-ወልድ፡በእስትንፋስ-መንፈስ ቅዱስ ይመሰላሉ። ነገር ግን አንድ ነፍስ እንደመሆኗ አንድ አምላክ ይባላል።

በዚህ ምሳሌነት አንጻር እግዚአብሔር ሥላሴ ነው (ሦስትነት አለው) ስንል  አብ ወልድ መንፈስ ቅዱስ ይባላል።

 ሥላሴ            - በአብ ልብነት ያስባሉ።

                   -በወልድ ቃልነት ይናገራሉ።

                   -በመንፈስ ቅዱስ ሕይወት ሕያው ሆነው ይኖራሉ።

 እግዚአብሔር በሥላሴነቱ የሚያስበው በአብ ነው፡ የሚናገረው በወልድ ነው፡ ሕያው ሆኖ የሚኖረው በመንፈስ ቅዱስ ነው።

፫. በክፍል ውስጥ የበሩ ሦስት ሻማዎች፡- በአንድ ክፍል ውስጥ ሦስት ሻማዎችን ብናበራ ክፍሉ በብርሃን ይሞላል። በክፍሉ ውስጥ ያለው ብርሃን ከየትኛው ሻማ የመጣ ነው? ቢባል ከዚህኛው ለማለት አይቻልም። በዚሁ አንጻር እግዚአብሔርም ሦስት አካላት አሉት ብንልም በመለኮት፡ በሕልውና ግን አንድ ነው። ይህ መለኮትና ሕልውና የማንኛው ነው ማለት አንችልም፡፡ የሦስቱም በእኩልነት ነው። በመከፋፈል ሳይሆን በአንድነት ነው።

የምሥጢረ-ሥላሴ አመላካች መጽሐፍ ቅዱሳዊ ጥቅሶች፡

መጽሐፍ ቅዱሳችን ስናጠና እግዚአብሔር ራሱን በብዙ ቁጥር የጠራባቸውን ክፍሎች እናገኛለን። ለአብነት ያህልም፡-

እግዚአብሔርም አለ፦ ሰውን በመልካችን እንደ ምሳሌአችን እንፍጠር፡ ዘፍ ፩፡፳፮።

እግዚአብሔር አምላክም አለ። እነሆ አዳም መልካምንና ክፉን ለማወቅ ከእኛ እንደ አንዱ ሆነ፡ ዘፍ ፫፡፳፪

እግዚአብሔር ለምን ራሱን በብዙ ቁጥር ተናገረ? አንዳንድ ወገኖች እንደ ነገሥታት አነጋገር በክብር መናገሩ ነው ይላሉ። ነገሥታት «እንዲህ አደረግን….» እንደሚሉት። እንደዚያ ከሆነ ግን በሁሉም ቦታ ራሱን በብዙ ቁጥር መናገር ነበረበት። እነዚህ ጥቅሶች እግዚአብሔር ከአንድ በላይ ማንነት እንዳለው ያመለክታሉ። ሦስት መሆኑን አያሳዩም። ወደ ሐዲስ ኪዳን ስንመጣ ሦስትነቱ ግልጽ ይሆናል።

ኢየሱስም ከተጠመቀ በኋላ ወዲያው ከውኃ ወጣ፤ እነሆም፥ ሰማያት ተከፈቱ የእግዚአብሔርም መንፈስ እንደ ርግብ ሲወርድ በእርሱ ላይም ሲመጣ አየ፤  እነሆም፥ ድምፅ ከሰማያት መጥቶ። በእርሱ ደስ የሚለኝ የምወደው ልጄ ይህ ነው አለ። ማቴ ፫፡፲፮-፲፯። እንግዲህ ሂዱና አሕዛብን ሁሉ በአብ በወልድና በመንፈስ ቅዱስ ስም እያጠመቃችኋቸው፥ ያዘዝኋችሁንም ሁሉ እንዲጠብቁ እያስተማራችኋቸው ደቀ መዛሙርት አድርጓቸው፤ ማቴ ፳፰፡፲፱። እንግዲህ አንድ ሰው መጽሐፍ ቅዱስን ሲያነብ እነዚህን ጥቅሶች ለመረዳት የእግዚአብሔርን አንድነትና ሦስትነት (ምሥጢረ-ሥላሴን) አስቀድሞ መማርና ማወቅ አለበት ማለት ነው። ካለበለዚያ እግዚአብሔር ለምን ራሱን አንድ ጊዜ ብዙ፡ አንድ ጊዜ ነጠላ እያደረገ እንደሚናገር ሊገባው አይችልም። ስለዚህ መጽሐፍ ቅዱስን በአግባቡ አይረዳውም ማለት ነው። በመጽሐፍ ቅዱስ ብዙ ጊዜ አብን- እግዚአብሔር፡ ወልድን-የእግዚአብሔር ቃል (ልጅ)፡ መንፈስ ቅዱስን- የእግዚአብሔር መንፈስ ይለዋል። እግዚአብሔር የሚለው ቃል ራሱ የአንድነትም የሦስትነትም ስም ነው። በሰዋሰው እግዚአብሔር የሚለው ቃል በሁለት አቅጣጫ ይተረጎማል፡- ፩. እግዚአብሔር የሚለው ቃል እግዚእ-  አብ - ሔር ከሚሉ ሦስት ቃላት የተገኘ ነው። እግዚእ-ጌታ ማለት ነው፡ ወልድ ነው። አብ- አብ ነው። ሔር- ቸር ማለት ነው ፡መንፈስ ቅዱስ ነው። ይህ ሦስትነቱን ያሳያል፡፡ ፪. እግዚአብሔር፡- እግዚአ እና ብሔር ከሚሉ ቃላት የተገኘ ነው። እግዚአ ማለት ገዥ/ጌታ፡ ብሔር-ሃገር/ዓለም ነው፡፡ ስለዚህ እግዚአብሔር ማለት የሃገር (የዓለም) ጌታ ማለት ነው። አንድ ጌታ ነው፡፡ ይህ አንድነቱን ያሳያል፡፡ እንግዲህ እግዚአብሔር የሚለው ቃል የአንድነትም የሦስትነትም ስም ነው። የምሥጢረ-ሥላሴ አመላካች የሆኑ ጥቅሶች ብዙ ናቸው። በየቦታቸው ስንደርስ እናብራራቸዋለን። ዋናው ነጥብ መጽሐፍ ቅዱስን በአግባቡ ለመረዳት ምሥጢረ-ሥላሴን ማወቅ አንድ ቅድመ-ሁኔታ መሆኑን ለማመልከት ያህል ብቻ እነዚህን ጥቅሶች አይተናል። በመቀጠል ለመጽሐፍ ቅዱስ ጥናታችን ማወቅ የሚገባን ስለ እግዚአብሔር ልጅ ስለ ኢየሱስ ክርስቶስ ማንነት ነው፡ይህም ምሥጢረ-ሥጋዌ ይባላል። ጌታ ቢፈቅድ ብንኖርም በቀጣይ ምሥጢረ-ሥጋዌን በአጭሩ እናያለን። ይቆየን። የጌታ የኢየሱስ ክርስቶስ ጸጋ የእግዚአብሔርም ፍቅር የመንፈስ ቅዱስም ኅብረት ከሁላችሁ ጋር ይሁን።  አሜን። ፪ቆሮ ፲፫፡፲፬።